کوردستان

جادەیا بارزان بوویە جهێ مرنێ

کوردستان دهوك دیجیتال میدیا

کاروان دۆسکى
د ماوەیێ 24 دەمژمێرێن بوورى دا ل سەر جادەیا سەرەکیا بارزان ل گەڤەرێ، دوو رویدان ژ جۆرێ لێدان چێبوون، ژوانژى ترۆمبێلێ ل سنێلەکى هەڤدە سالى و دانعەمرەکى حەفتێ سالى دایە، هەردوو روویدان ژى ل ئێک جهـ بوون.
ل گۆرەى وان دیدەڤان ئەوێن روویدان ب چاڤێن خۆ دیتین، روویدانا ئێکێ ل دەمژمێر 8 شەڤێ بوو دەما سنێلەکێ 17 سالى دڤیا ژ جادەیێ دەرباس بیت لێ ب مخابنى ڤە لوى دەمى ترۆمبێلەکا ژ جۆرێ کامرى ب لەزاتیەکا زێدە دهات و ل وى سنێلەى دا هەر ئێکسەر گیانێ خۆ ژ دەستدا.
ب گۆتنا پۆلیسێن ترافیکێ: ژبەرکو ل جادەیا گەڤەرکێ دوو یوتێرن دهێنە دروستکرن و رادار ژوان جهان هاتینە راکرن لەورا شۆفێر لەزاتیێ بکار دئینن و روویدان دروستبن.
پشتى بوورینا چەند دەمژمێرێن کێم ل سەر روویدانا ئێکێ، دیسا ل هەمان جهــ ترۆمبێلەکا ژ جۆرێ چێب ل دانعەمرەکێ 70 سالى دا و هاتە ڤەگۆهاستن بۆ نەخۆشخانا تەنگاڤین ل دهۆکێ و دبن چاڤدریا چڕ یا نۆژداران دایە.
ژبەرکو د دەمەکێ کێم دا دوو روویدان ل ئێک جهــ چێبوون پۆلیسێن ترافیکێ بریاردا رادارێن گەرۆک بۆ دەما 24 دەمژمێران لوى جهى بدانن داکو شوفێر لەزاتیێ بکار نەئینن و روویدان زێدە نەبن.
ژبەرکو جادەیا بارزان ئێک ژ رێکا سەرەکى یا هاتنووچوونێ یە و ژمارەکا زۆر یا خانى و قوتابخانە و مزگەفتان دناڤبەرا هەردوو جادەیان دا هەیە، ئەو هاتنووچوونێ ل سەر جادەیێ دکەن لێ پۆلیسێن ترافیکێ داخواز ژ خەلکى دکەن دەما ژ جادەیێ دەرباز دبن بلا پرێن ئاسنى بکار بینن ژبەرکو دناڤبەرا جهێ روویدانێ و پرێن ئاسنى دا 300 مەترن ئەو دشێن خۆ ژڤان روویدانا ب پارێزن.
ل گۆرەى ئامارێن هاتووچوونێ دهۆکێ ل دەما سالەکێ دا ل جادەیا گەڤەرکێ ترۆمبێلێ ل 8 کەسان دایە و 5 کەسان گیانێ خۆ ژدەستدایە.