عێراق
وەزارەتا کۆچ و کۆچبەران: 22 هزار عیراقی ل کەمپا هۆل مانە
2025-04-18 , 06:49
کوردستان دهوك دیجیتال میدیا
ئاخفتنگۆیێ وەزارەتا کۆچ و کۆچبەرێن عیراقێ راگەهاند، هەتا نهۆ 10 هزار هەڤوەلاتیێن عیراقی ژ کەمپا هۆل ڤەگەراندینە و د دەمەکێ نێزیک دا کاروانەکا دی یا عیراقیان ژ کەمپێ دێ هێتە ڤەگەراندن.
عەلی عەباس، ئاخفتنگۆیێ وەزارەتا کۆچ و کۆچبەرێن عیراقێ، رۆژا یەکشەمبێ 04-08-2024 بۆ تۆرا مەدیایی روداوێ راگەهاند کو جگە ژ وان هەڤوەلاتیێن کو ڤەگەراندینە، نێزیکی 22 هزارێن دی هێشتا ل کەمپێ دا مانە.
کەمپا هۆل دکەڤیتە پارێزگەها حەسەکێ یا رۆژئاڤایێ کوردستانێ و ل ژێر دەستهەلاتا هێزێن سوریا دیموکرات (هەسەدە) دایە. بەشەکێ مەزن یێ نیشتەجهێن کەمپێ ژن و زارۆکێن چەکدارێن بەرێ یێن داعشێ نە.
ئەو مالباتێن عیراقی یێن کو ژ کەمپا هۆل دهێنە ڤەگەراندن، دهێنە برن بۆ کەمپا جەدعە ل گوندێ جەدعێ یێ سەر ب باژارۆکا گەیارە ل پارێزگەها نەینەوا، کو سالا 2021 بۆ وەرگرتنا کەس و کارێن چەکدارێن داعشێ (یێن کو هەلگرێن ناسنامەیا عیراقێ نە) هاتیە چێکرن.
شکەستنێن رێکخراوا داعشێ د سالا 2017 دا ل عیراقێ و پاشی ل دەڤەرێن سوریا، رێکخراو بەرەڤ لاوازیێ بر، بەشەکێ مەزن ژ سەرکردەیێن وان هاتنە کوشتن و بەشەکێ پتر ژ ئەندامێن وان کەتنە دەستێ هێزێن ئەمنی، بەشەک ژ نیشتەجهێن کەمپا جەدعە ژ کەس و کارێن وان چەکدارێن داعشێ نە.
ل گۆر ئامارێن رێکخراوا نەتەوەیێن یەکگرتی، 56 هزار کەس ژ خەلکێ وەلاتێن جودا ل کەمپا هۆل ل رۆژئاڤایێ کوردستانێ دژین کو مەزنترین کەمپە بۆ کەس و کارێن چەکدارێن داعشێ هاتیە چێکرن.