عێراق
وەزارەتا پلاندانانێ یا عیراقێ دبێژیت: 70% ژ کارێن گەمارۆسازی و ژمارکرنێ ل پارێزگەها کەرکووکێ تەمام بوویە
2025-04-18 , 10:58
کوردستان دهوك دیجیتال میدیا
بریارە سەرژمێریا گشتی ل عیراقێ و هەرێما کوردستانێ ل 20ـێ چریا دووێ یا ئەڤ سالێ بهێتە ئەنجامدان. دەستپێکرنا قوناغ ب قوناغ یا پرۆسێ دەست پێکریە. قوناغا ئێکێ یا ژ گەمارۆسازی و ژمارکرنێ پێک دهێت.
رۆژا شەمبی 28-09-2024، عەبدولزەهرە هینداوی، ئاخفتڤانێ وەزارەتا پلاندانانێ یا عیراقێ بۆ تۆڕا مەدیایی یا رووداو راگەهاند: "کارێن پرۆسەیا گەمارۆسازی و ژمارکرنێ ل عیراقێ گەلەک باش دچن. ل پارێزگەها کەرکووکێ 70% ژ کارێن ڤێ قوناغێ تەمام بوویە."
ئاخفتڤانێ وەزارەتا پلاندانانێ یا عیراقێ گۆت ژی کو ل پرانیا پارێزگەهێن عیراقێ دا شێوازێ چوونا پرۆسێ نێزیکی هەڤ ە.
دەربارەی هەڤئاهەنگیێ دگەل هەرێما کوردستانێ بۆ ئەنجامدانا سەرژمێریێ، ئاخفتڤانێ وەزارەتا پلاندانانێ یا عیراقێ گۆت: "هەڤئاهەنگیەکا باش دگەل حکوومەتا هەرێما کوردستانێ هەیە". وی گۆت ژی: "هەفتیا بۆری شاندەکێ دەستەیا ئامارێ یا حکوومەتا هەرێما کوردستانێ ل بەغدادێ بوو؛ بەری وێ ژی شاندەکێ دەستەیا ئامارێ یا عیراقێ ل هەرێما کوردستانێ بوو."
دەربارەی دەستپێکرنا قوناغا دووێ یا سەرژمێریێ، عەبدولزەهرە هینداوی دبێژیت: "پشتی تەمامبوونا قوناغا ئێکێ، 120,000 لێکۆلەرێن دی دێ هێنە راهێنانکرن دا کو ل 20ـێ چریا دووێ یا 2024ـێ دەست ب قوناغا دووێ بکەین."
ژ سالا 2009ـێ ڤە حکوومەتا عیراقێ پلان هەیە سەرژمێریێ ئەنجام بدەت، لێ گەلەک هۆکاران رێ ل بەر ئەنجامدان و چوونا وێ گرتیە.
ل گۆر پێشبینیێن وەزارەتا پلاندانانێ یا عیراقێ، ژمارا دانیشتوانێن عیراقێ ل سالا 2030ـێ دێ گەهیتە 51 ملیۆن و 211 هزار و 700 کەس.