عێراق
وەزیرێ ناڤخویێ عیراقێ: ئەم دێ درۆنا کڕین
2025-04-17 , 05:37
کوردستان دهوك دیجیتال میدیا
وەزیرێ ناڤخویێ عیراقێ راگەهاند، وەزارەتا وی ب رێژا ١٠٠٪ سەرکەفتی بوویە د رێگرتنا پێشێلکاریا ل سەر بۆریێن نەفتێ. هەروەسا گۆت: "ئەم دێ گرێبەستەکێ مۆر کەین بۆ کڕینا درۆنا."
ئەڤ ئاخفتنێن عەبدولئەمیر شەمەری، وەزیرێ ناڤخویێ عیراقێ د ئاهەنگا بیرئینانا ١٠٣ سالیا دامەزراندنا پۆلیسێ دا بوون کو ئەڤرۆ پێنجشەمب ٩ێ کانوینا دووێ ٢٠٢٥ ل بەغدا هاتە ئەنجامدان.
عەبدولئەمیر شەمەری راگەهاند، وەزارەتا ناڤخۆ د دەمێ مۆرکرنا گرێبەستەکێ دایە دگەل دەستەیا پیشەسازیا شەڕی بۆ کڕینا درۆنا. وی ئاماژە ب وێ چەندێ دا کو دۆسیا ئەمنی یا حەفت پارێزگەها ژ وەزارەتا بەرگریێ وەرگرتینە و رادەستکرنا دۆسیا ئەمنی یا پارێزگەهێن دی ژی ئێک ل دویڤ ئێک دێ هێتە کرن.
٩ێ کانوینا دووێ ١٩٢١، د سەردەمێ دەستهەلاتا پاشایەتیا عیراقێ دا، بۆ جارا ئێکێ یەکەیەکا پۆلیسێ بۆ وەزارەتا ناڤخۆ یا وی دەمی هاتە پێکئینان.
عەبدولئەمیر شەمەری ئاماژە ب وێ چەندێ دا کو د سالا ٢٠٢٤ دا نێزیکی ١٧ هزار چالاکی دژی تاوانێن رێکخستی ئەنجام داینە.
دەربارەی جێبەجێکرنا کارێن هاوەلاتیان ژی، گۆت: "هەتا نوکە ٤٢ ملیۆن کارتێن نیشتمانی هاتینە دەرکرن و ٢٦ نڤیسینگەه بۆ دەرکرنا ڤان کارتان و پاسپۆرتێن ئەلەکترۆنی ل دەرڤەی عیراقێ هاتینە ڤەکرن."