کوردستان
ناڤەرۆکا جڤینا بارزانی و مەزلووم عەبدی
2025-04-19 , 01:00
کوردستان دهوك دیجیتال میدیا
کەنالا عەرەبییە ژ دەڤێ ژێدەرەکێ هایدار ڤە هوورگلیێن نوو یێن جڤینا مەسعود بارزانی سەرۆکێ پارتا دیموکرات و مەزلووم عەبدی فەرماندارێ هێزێن سووریا دیموکرات ئاشکرا کر و دبێژیت، بارزانی دخوازیت رۆلا ناڤبژیڤانیێ بلیزیت.
ل گۆر ژێدەری، مەزلووم عەبدی ب هەڤالینیا بەرپرسێن هەڤپەیمانیا ناڤدەولەتی یا دژی داعش ب سەرکێشیا ئەمریکا سەرەدانا هەولێرێ کریە.
هەر ل گۆر ژێدەری، بارزانی هەول ددەت رۆلا ناڤبژیڤان د ناڤبەرا تورکیا و هێزێن (هەسەدە) دا بلیزیت، کو دەمەکە ل دەڤەرێن باکوور و رۆژهەلاتا سووریا (رۆژاڤایێ کوردستانێ) شەڕ و پێکدان د ناڤبەرا وان دا هەیە.
ژێدەر ئاماژە ب وێ ژی کر کو ئەڤ رۆلا ناڤبژیڤانیێ یا بارزانی دخوازیت بلیزیت، ب هاندان و پشتەڤانیا ئەمریکیانە، ژێدەر ئاشکرا کر کو پرانیا گوتوبێژێن جڤینێ تایبەت بوون ب ڤێ چەندێ.
مەزلووم عەبدی رۆژا پێنج شەمبێ سەرەدانا هەولێرێ کر و دگەل بارزانی جڤیا، کو سەرەدان پشتی سێ رۆژان ژ سەرەدانا حەمید دەربەندی نوێنەرێ بارزانی بۆ رۆژاڤایێ کوردستانێ هات، کو ناڤبری ل حەسەکێ دگەل عەبدی جڤینەک کر.
ژ بلی وێ ژێدەر، ئەو ژی ئاشکرا کر کو عەبدی و بارزانی بەحسێ ئێکگرتنا لایەنێن کوردی ل سووریا کرن، و تەئکید کرن کو هەلویستێن خوە ل ژێر رۆناهیا وان گوهۆڕینان یێن ل وەلاتی رویددەن ئێک بخن.
هەروەسا ل گۆر ژێدەری، عەبدی و بارزانی تەئکید ل سەر وێ ژی کرن کو پێدڤیە "ئێکگرتنا لایەنێن کوردێن جودا یێن سووریا" بەری نڤیسینا دەستوورەکێ نوو ل سووریا بیت.
ل گۆر وی ژێدەری بارزانی تەئکید ل سەر پێدڤیا بدەستڤەئینانا "مافێ تەمام" د چارچوڤێ یەکیتیا ئاخا سووریا دا بۆ کورد کریە، ب مەرجێ "هێزا لەشکەری یا خوە بپارێزن".
کەنالا عەرەبییە ژ دەڤێ ژێدەری ئەو ژی ئاشکرا کر، ئەگەر بارزانی سەرکەفتی بیت د ناڤبژیڤانیێ دا د ناڤبەرا تورکیا و هێزێن هەسەدە، ئەگەرا وێ زۆرە 3 دەرگەهێن سنووری د ناڤبەرا "دەڤەرێن د بن دەستهەلاتا هێزێن سووریا دیموکرات" و تورکیا دا بهێنە ڤەکرن و بازرگانی د ناڤبەرا وان دا بهێتە کرن.
جڤینا د ناڤبەرا عەبدی و بارزانی دا نێزیکی دوو دەمژمێران کێشا، کو کەنالێ بەحسێ وێ کر کو دیار ئەڤە دێ بیتە ئەگەرێ ڤەکشینا چەکدارێن پەکەکە ژ سووریا بۆ دوورکرنا بەهانەیێن تورکیا ل دەڤەرێ.