کوردستان

راگەهاندنەک ژ مەکتەبا سیاسیا پارتی

کوردستان دهوك دیجیتال میدیا

دەقێ راگەهاندنا پارتی دیموکراتی کوردستان:

ل وی سەردەمێ سەخت و دژوار یێ وی دەمی و وەکو پێدڤیەکا مێژوویی و بەرخودان، شۆڕشا مەزنا ئیلۆنێ وەکو جوولانەوەیەکا سیاسی هەلگیرسا، بەرپابوونا شۆڕشا مەزنا ئیلۆنێ ب رابەریا بارزانیێ نەمر و پێشڕەویا پارتیا مە لاپەرەکا پرشنگدار یا نوی د بزاڤا رزگاریخوازی یا کوردستانێ دا ب خوین و گیانفیدایی تۆمار کر.

شۆڕشێ ل وی قۆناغی بایەخ و کارتێکرنەکا زۆرا هەبوو لسەر بزاڤا رزگاریخوازی و نەتەوەیی و نیشتیمانی یا مە، ژبەرکو هەلگرێ پەیامەکا راست و دروست و بابەتیانە و ئەقلانی بوو، هەروەسا شۆڕشێ ئەو راستی سەلماند کو رەگ و ریشالێن ئیرادە و ورەیا پۆلایین یا رۆلێن گەلێ مە ژ بن نایێن و هەتا ب جهئینانا ئارمانجێن مە کۆل نادەن.

ئەو بزاڤا سیاسی ب گۆرەی هەلومەرجێن وی دەمی خودان خەسڵەت و تایبەتمەندیێن خۆ بوو ژ روویێ سیاسی و کۆمەلایەتی و سەربازیڤە، لەورا شوناسەکێ جوداژی هەبوو کو خەباتەکا نەپسا بوو بۆ وێ چەندێ کو دووماهیێ ب شەڤرەشیا زۆرداری و نەهامەتیێ بینیت.

یەک ژ بنەما گونجای و رەسەنێن شۆڕشێ، رەنگڤەدانا کۆمەلگەها فرەرەنگ یا کوردستانی و کولتوورێ شۆڕشگێڕی یا کوردایەتی و نیشتیمانپەروەری بوو، لسەر ڤێ چەندێ شۆڕشەکا درێژخایەن و مەزن و سەرتاسەری بوو، ل وێ رێیێ ژی قوربانیێن بێشوومار پێشکێشی ئاخ و نەتەوە و دۆزا مە یا رەوا کر.

شۆڕشا ئیلۆنێ ب ئەجێندایەکا نوی و رێک و پێک یا بەرنامە بۆ دارشتی یا سەربازی و سیاسی و دیپلۆماسی بۆ بەرژەوەندیێن بلندێن گەل و نەتەوا مە و خەلکێ کوردستانێ ب گشتی خۆ ددیت و چ جار ژ وێ رێچکە و رێبازێ لێڤە نەدا و نە بتنێ ژ پیلانگێڕی و ناپاکیێ سازش و سل نەکر، بەلکو سوورتر بوو لسەر گەرمکرن و رابوونا سیاسی و باشترکرنا بارێ ئابووری و کولتووری یێ هۆشیاریێ و گەهشتن ب ئارمانجێن مە یێن رەوا.

ژ لایەکێ دیڤە، شۆڕشا مەزنا ئیلۆنێ سەرتاسەری کوردستان کرە یەکدەست و هەموو سنۆرێن ناڤچەیی و ئایینی و مەزهەبی سڕینەڤە و تەمامیا گەلێ کورد و کوردستانێ د چوارچوڤێ هێزەکا بەرگریکار دژ ب دیکتاتۆریێ دا یەکخست و هێز بەخشیە گەلێ کوردستانێ بۆ بەرگریکرنێ ژ مافێن خۆ.

شۆڕشا مەزنا ئیلۆنێ ب گۆرەی کارنامە و پلانا دارشتی یا خۆ بۆ راگەهاندن و بەرپاکرنا شۆڕشێ و بەردەوامبوونا وێ بۆ ب جهئینانا مافێن رەوایێن گەلێ مە، وەکو وەرچەرخانەکا گرنگ رۆل و سەنگا بزاڤا رزگاریخوازی یا کوردستانێ بۆ قۆناغەکا سیاسی یا پێشکەڤتیتر گوهاراند ب جۆرەکی لسەر گۆڕەپانا سیاسی یا ناڤخۆیی و جیهانی دا، ئەو بزاڤا شۆڕشگێڕی نە بتنێ شۆڕشەکا چەکداری بوو، بەلکو شۆڕشەک بوو د بوارێ کۆمەلایەتی دا ب تایبەتی ژ روویێ پێکهاتن و پاراستنا خێزانێ و، بوارێ پەروەردە و پێگەهاندن و ساخلەمی و ئیدارەدانا کۆمەلگەهێ و رێک و بان و میدیا و پەیوەندیان و گۆرانکاریێن زۆر ئەنجامدان و رۆلێ نەتەوەیی و نیشتیمانی لسەر ئاستەکێ بلند گێڕا و، شییا چەندین دەسکەفتێن گرنگێن نەتەوەیی و نیشتیمانی و سیاسی و ئیداری و رۆشنبیری و مێژوویی ژی بۆ گەلێ مە ب جهبینیت ژ وان ژی: رێککەفتناما (11ێ ئادارا 1970ێ).

ئەو بۆنە ب دەرفەت دزانین وەکو هەردەم جەختێ لسەر رێبازا رەگداکوتی یا کوردایەتی و نەتەوەیی و پارتایەتیا مە بکەینەڤە بۆ پتهوکرنا هەماهەنگی و هاوگۆتارا سیاسی و هاوهەلویستیا سەرجەم حزب و لایەنێن سیاسی یێن کوردستانێ بۆ چارەسەرکرنا کیشە و گیروگرفتان و پاراستنا قەوارەیا سیاسی یا هەرێمێ و دەسکەفتێن مە.

ل وێ یادا پیرۆز دا و ل سەروبەندا هەلبژارتنێن خولا شەشێ یا ئەنجوومەنێ نوونەرێن عیراقێ، جەختێ لسەر بەشداریکرن و پرۆسەیا هەلبژارتنەکا پاقژ و بێگەرد و ئازادانە دکەینەڤە کو بریارە ل 11/11/2025ێ بهێتە ئەنجامدان، بۆ وێ چەندێ کو قۆناغا داهاتی یا پرۆسەیا سیاسی یا عیراقا فیدرال لسەر بنەمایەکا راست و دروست بهێتە دارشتن و کیشە و قەیران بهێنە چارەسەرکرن و ژناڤبرن، بۆ ڤێ چەندێ ژی چاڤەرێیا مە ژ جەماوەرێ دلۆڤانێ پارتیا مە و خەلکێ ب ئەڤین یێ کوردستانێ و سەرجەم عیراقێ یە، پشتەڤانیا بەرنامە و هەنگاڤێن پارتیا مە بکەن کو جەختکرنە لسەر ب جهئینانا دەستووری و چەسپاندنا پرەنسیپێن بنیادنانا عیراقا نوی یە، وەکو وەلاتیێ هەموویان.

لسەر ئاستێ دەرڤە و ناڤچە ژی، پارتیا مە ژ پێخەمەت ئارامی و ئاسایشا خەلکێ کوردستانێ بەردەوام هەول دا دگەل وەڵاتێن دەڤ دەڤک د پەیوەندیەکا باش و هاوسەنگ دا بیت، کو بەرژەوەندیێن هەموو لایەکی تێدا پاراستی بن.

ل ڤێ یادا مەزن یا مێژوویی دا، ئەم ل پارتی دیموکراتی کوردستان، وەکو هەردەم جەختێ لسەر بنەما سەرەکی و نەگوهۆر دکەینەڤە، ب جۆرەکی ب هەموو لایێ خۆ ڤە لسەر پرسێن ستراتیژی یێن کوردستانێ، ژ داکۆکیکرنێ ل مافێن مە یێن رەوا و دەستووری و ل ئاخا مە و ل دەسکەفت و قەوارەیا نیشتیمانیا مە و، ل پاراستنا دامودەزگەهێن شەرعی یێن کوردستانێ (سەرۆکاتیا هەرێمێ و حکوومەت و پەرلەمانێ کوردستانێ) یەکریز و هاوئاراستە و هاوگۆتار بین.

د بیرەوەرییا شۆڕشا مەزنا ئیلۆنێ دا هێشتا بەلێن و ئەمەکداریێ بۆ گەلێ کوردستانێ و سەرۆک (مەسعود بارزانی) و خوین و گیانێ شەهیدێن مە یێن نەمر دووپات دکەینەڤە کو لسەر هەمان رێبازا کوردایەتی و نەتەوەیی و نیشتیمانیا خۆ نەسرەوین.

ل وێ یادا مەزن دا پیرۆزباهیەکا گەرم ل جەماوەرێ دلۆڤانێ کوردستانێ دکەین، سەری رێز و نەوازشێ بۆ شەهیدێن رێکا رزگاری و سەربەخویا کورد و کوردستانێ دادنوێنین، سلاو و رێز ل خانەوادە و کەس و کارێن سەربلندێن شەهیدێن مە یێن نەمر، سلاو ل هێزا پێشمەرگەیێ کوردستانێ.

سلاو ل بیرەوەرییا (64) سالیا شۆڕشا مەزنا ئیلۆنێ.

سلاو ل گیانێ پاقژێ بارزانیێ نەمر و کاکە ئیدریسێ هەردەم زیندی.

بلند و شەکاوە بیت ئالایێ پیرۆزێ کوردستانێ.

هەردەم گەلێ مە سەربلند و کوردستان ژی هەر ئاڤادان.

مەکتەبا سیاسی یا پارتی دیموکراتی کوردستان

10ێ ئیلۆنا 2025ێ