کوردستان
بێبەشبوونا سهدان هزار كه‌سان ژ به‌شه‌خوارنا هه‌یڤانه
2025-10-18 , 17:10
کوردستان دهوك دیجیتال میدیا
ب دلیلی تۆمارنه‌كرنا وان د فۆڕما ئه‌لیكترۆنی یا خوارنێ دا، پشکا ئاردی یا خوارنێ ژ 700 هزار وه‌لاتییێن هه‌رێما کوردستانێ دهێته بڕین.
ڤێ هه‌یڤێ ژی وه‌کوو هه‌یڤا بۆری، سهدان هزار كه‌س بێبه‌ش دبن ژ وه‌رگرتنا پشکا خوارنا هه‌یڤانه و ئه‌گه‌رێ وێ ژی دهێته دیاركرن.
ئه‌ڤرۆ ئێکشه‌مبی، ژێده‌ره‌کێ ئاگادار راگه‌هاند، پتر ژ 700 هزار وه‌لاتیان ل هه‌رێما کوردستانێ، ژبه‌ر كو خوه د فۆڕما ئه‌لیكترۆنی یا خوارنێ دا تۆمار نه‌كریه، ڤێ هه‌یڤێ ژی نكارن ئارد و پشکا خوارنا هه‌یڤانه وه‌ربگرن.
ژ لایه‌كێ دیڤه، نه‌وزاد شێخ کامل، رێڤه‌به‌رێ گشتی یێ بازرگانی ل وه‌زاره‌تا بازرگانی و پیشه‌سازیێ ئاشكرا كر، كو ڤێ هه‌یڤێ ژی ب هه‌مان شێوه‌ی هه‌یڤا بۆری ره‌فتار دهێته كرن، 700 هزار كه‌س ژ پشکا ئاردی بێبه‌ش دبن و پشکا خوارنا شه‌شێ ژی وه‌رناگرن.
ئه‌ڤه د ده‌مه‌كی دایه، وه‌زاره‌تا بازرگانی یا عیراقێ بڕیار دایه هه‌ر كه‌سه‌كێ كو خوه د فۆڕما ئه‌لیكترۆنی یا خوارنێ دا تۆمار نه‌كه‌ت، ئه‌وا راسته‌وخوه بێبه‌ش دبیت ژ وه‌رگرتنا پشکا خوارنا هه‌یڤانه و نكاریت مفای ژ ڤێ پرسێ ببینیت.