کوردستان

شۆڕەشا ئاڤەدانیێ ل دهۆکێ؛ پرۆژەیێ ستراتیژی یێ ئێتیت - باعەدرێ بەرەڤ قۆناغا دوماهیێ دچیت

کوردستان دهوك دیجیتال میدیا

وەک بەشەک ژ وێ کاروانا ئاڤەدانیێ یا کابینا نەهێ یا حکومەتا هەرێما کوردستانێ بۆ ڤەژاندنا ژێرخانا ڕێکا دەستپێکری، پرۆژەیێ ستراتیژی یێ ڕێکا (ئێتیت - باعەدرێ) ل سنوورێ پارێزگەها دهۆکێ، ب لەزاتیەکا کێم وێنە و ب ستانداردەکێ جیهانی یێ بەردەوامە د جێبەجێکرنێ دا. ئەڤ پرۆژە کو بڕبڕا پشتا هاتنوچوونا دەڤەرێ پێکدئینیت، نە بتنێ ئاسانکاریێ بۆ وەلاتیان دکەت، بەلکو دێ بیتە کلیلەکا گرنگ بۆ پێشێخستنا کەرتێ بازرگانی ل دەڤەرێ.

ئەڤ ڕێکە کو درێژاهیا وێ ٢٦ کیلۆمەترن، دەستپێکا باژێرێ دهۆکێ ب ناحیا باعەدرێ ڤە دگرێدەت و ل سەر سێ قۆناغێن سەرەکی دابەش بوویە. ئەوا جهێ سەرنج و دەستخۆشیێ، لەزاتیا جێبەجێکرنا کارایە؛ ل دویڤ دیڤچوونێن داویێ، پرۆژە ٣٠٪ ژ وی دەمی پێشترە یێ بۆ هاتیە دیارکرن. هەتا نوکە ٧٥٪ ژ سەرجەمێ کاران ب دوماهی هاتیە، ب ئاوایەکێ کو قۆناغا ئێكێ ل بەر لێڤێن ب دوماهی هاتنێ یە و کارکرن ل هەردوو قۆناغێن دووێ و سێیێ ژی ب چڕی یا بەردەوامە دا کو د زووترین دەم دا بکەڤیتە د خزمەتا وەلاتیان دا.

ژ لایێ ئەندازیاری و تێچووی (مەزاختی) ڤە، حکومەتا هەرێمێ کۆژمێ ١٣٥ ملیار دیناران بۆ ڤی پرۆژەیێ ستراتیژی تەرخانکرینە. دا کو ڕێک ب تەمامی سەردەمیانە بیت و قەرەبالغیا هاتنوچوونێ کێم بکەت، ١٠ ئۆڤەرپاس و ئەندەرپاس (پردێن دەربازبوونێ) تێدا دێ هێنە دروستکرن، کو هەموو ل دویڤ نووترین ستانداردێن جیهانی هاتینە دیزاینکرن.

ئەڤ پێنگاڤێن کابینا نەهێ نیشانا ڕاستگۆیا حکومەتێ یە ل سەر بەلێنێن خۆ بۆ خزمەتکرنا هەموو دەڤەرێن کوردستانێ بێ جوداهی. ئارمانجا سەرەکی ل ڤێرە نە بتنێ قێرکرنا ڕێکەکێ یە، بەلکو دروستکرنا تۆڕەکا پەیوەندیێ یا ب هێزە کو ئاسایشا هاتنوچوونا وەلاتیان بپارێزیت و ژێرخانا ئابووری یا کوردستانێ بەرەڤ قۆناغەکا نوو و گەشەسەندی ببەت.