کوردستان

مەسرور بارزانی: داخواز ژ لایەنێن سیاسییێن کوردستانێ دکەم بەرژەوەندییێن هەرێمێ بێخنە بەری بەرژەوەندییێن حزبی

کوردستان دهوك دیجیتال میدیا

مەسرور بارزانی، سەرۆكێ حكومەتا هەرێما كوردستانێ ب هەلكەفتا هاتنا سالا نوی پەیامەك بەلاڤكر

دەقێ پەیاما سەرۆكێ حكومەتا هەرێما كوردستانێ:

ب هەلكەفتا هاتنا سالا نوی یا زاینی 2024ێ گەرمترین پیرۆزباهی ل گشت كوردستانییان ب تایبەت پێشمەرگەیێن قارەمان و هێزێن ئاسایشا ناڤخۆ و مالبات و كەسوكارێن سەربلندێن شەهیدان و گەلێن عیراقێ و جیهانێ دکەم، هیڤیدارم سالا نوی سالا خێر و خۆشی و خۆشگوزەرانی و پێشکەفتنا زێدەتر یا کوردستانێ بیت، سوپاسییا خۆ ڕاگرییا وەلاتییێن هەرێما کوردستانێ دکەم کو د سالا بووریدا ب ئەگەرێ نە هنارتنا مووچە و شایسەتەیێن دارایی یێن هەرێمێ ژ لایێ حکومەتا فیدڕال، مە ڕەوشەکا دژوار یا دارایی دەربازکر، هیڤیدارم سالا نوی دوماهییا زۆرداری و نە دادییێ بیت کو بەرامبه‌ر وەلاتییێن هەرێما کوردستانێ و ب تایبەتی فەرمانبەران دهێتەکرن و ئاریشەیا شایساتەیێن دارایی یێن هەرێمێ ب شێوەیەکێ دادپەروەرانە، د چوارچوڤەیێ ڕێکەفتتنان و یاسایا بودجەی دا بهێتە چارەسەرکرن، و فەرمانبەرێن هەرێمێ ژی وەکی فەرمانبەرێن دەڤەرێن دی یێن عیراقێ هەیڤانە بێی تێکەلکرن دگەل ئاریشەیێن سیاسی مووچەیێ خۆ وەربگرن.

داخواز ژ هێز و لایەنێن سیاسی یێن هەرێما کوردستانێ دکەم کو بەرژەوەندییێن بلند یێن هەرێما کوردستانێ بێخنە بەری بەرژەوەندییێن حزبی و کەسایەتی یێن خۆ و ژ پێخەمەت پاراستنا ئارامی و مافێن ڕەوا یێن وەلاتییێن هەرێما کوردستانێ کار بکەن.
جهێ خۆشحالییێ یە کو ل سالا بووری، سەرەڕای ڕەوشا دژوار یا ئابووری ئەم شیاین ب هاریکارییا کەرتێ تایبەت چەند پڕۆژەیێن خزمەتگۆزاری ل باژێر و دەڤەرێن هەرێما کوردستانێ د بوارێن جودا دا ئەنجام بدەین و هەروەسا د بوارێ دیپلوماسی ژی دا بەراورد ب سالا بووری، پەیوەندییێن هەرێما کوردستانێ و وەلاتێن جیهانێ گەشەیەکا باشتر ب خۆڤە دیت.
هیڤیدارم سالا نوی سالا دوماهی هاتنا شەڕ و ئالۆزی و کاڤلکارییێن رۆژهەلاتا ناڤەڕاست و هەمی جیهانێ ب گشتی بیت و ئاشتی و ئارامی جێگیر بیت و سالا دەستکەفت و گەشەپێدان و ڤەژاندنا گشتگیر یا کوردستانێ بیت.
سالا نوی ل هەمییان پیرۆز بیت.
مەسرور بارزانی
سەرۆکێ حکومەتا هەرێما کوردستانێ

31 کانوونا ئێکێ 2023