عێراق

بنەمالا لەتیف ڕەشید کەتنە د ناڤ لیستا ڕەشا زەیدی دا

د دویڤچوونەکا هوور دا، کو بۆ چەند دۆسیەیێن مەرن یێن گەندەلیا دارایی هاتیە کرن و پەیوەندی ب لەتیف ڕەشید، سەرۆککۆمارێ پێشتر یێ عێراقێ و کورێ وی ڤە هەیە، دیار بوویە کو بنەمالا سەرۆککۆمارێ پێشتر ئێک ژ ئارمانجێن سەرەکی یێن هەلمەتا عەلی زەیدی نە بۆ دەستەسەرکرنا حوتێن مەزن یێن گەندەلیێ، و مەترسیا دەستەسەرکرنێ ل سەر وان هەیە.
ب پێی پێزانینان، دۆسیەیا سپیکرنا پتر ژ 700 ملیار دیناران ژ لایێ «دێرین لەتیف ڕەشید»، کورێ سەرۆککۆمارێ پێشتر، هاتیە دانیان ل بەردەم دەستەیا دەستپاکیێ. ناڤبری هەژمارا بانکی یا پتر ژ 300 فەرمانبەران بۆ ڤی مەبەستی بکارئینایە.
سکانداڵەکا دی یا مەزن پەیوەندی ب کۆمپانیا «ئای کیو» و دزینا ئینتەرنێتێ ڤە هەیە، کو بوویە ئەگەرێ ژناڤچوونا 991 ملیار دیناران ژ داهاتێ عێراقێ. ئەڤ کۆمپانیایە د بن گەف و فشاران دا ژ خودانێ وێ یێ ڕاستەقینە هاتیە سەندن و کورێن لەتیف ڕەشید دەست ب سەر دا گرتینە، د دەمەکێ دا کو بەری نوکە پشکا پتریا وێ یا «دانا حوسێن قادر» بوو.
ژ لایەکێ دی ڤە، «چاڵاک سەباح عومەر»، سکرتێرێ لەتیف ڕەشید، ب ناڤێ سەرۆککۆماری ب دەهان ملیار دینار وەک سەرانە (سەرانەگرتن) ژ بازرگانێن سلێمانیێ و بەغدا وەرگرتینە.
ئەڤە د دەمەکێ دا یە، حکومەتا عەلی زەیدی د چوارچۆڤەیێ هەلمەتا (بەرەبەیان) دا، پتر ژ 67 بەرپرسێن بلند و پەرلەمانتارێن وەک «موسەننا سامەڕائی» و «عالیە نوسەیف» دەستەسەرکرینە. دەستەیا دەستپاکیێ تەئکید کریە کو پشتەڤانیەکا بێ سنوور یا هەی بۆ ڤەکۆلینێ دگەل هەمی وان کەسانێن ناڤێ وان د دۆسیەیێن گەندەلیێ دا هاتی، بێی کو چ چاڤپۆشی ژ پۆستێن وان یێن پێشتر بهێتە کرن.