عێراق
هێزێن ئەمنی ل پارێزگەها موسەننا تۆرەکا دزییا پەترۆلا خاڤ گرتن
2026-10-11 , 21:49
دەزگەهێ ئاسایشا نیشتیمانی یێ عێراقێ، تۆرەکا تاوانکاری هەلوەشاند کو کارێ وان دزین و قاچاخییا پەترۆلا خاڤ بوو، ئەڤە ژی ب رێیا کونکرنا ئێک ژ بۆرییێن ستراتیژی یێن ڤەگوهاستنا پەترۆلێ ل پارێزگەها موسەننا.
ئەرشەد حاکم، پەیڤدارێ دەزگەهێ ئاسایشا نیشتیمانی یێ عێراقێ، راگەهاند: "د چارچۆڤەیێ بزاڤان دا بۆ پاراستنا سامانێ گشتی و لێکتێهلدان و بهنگاربوونا قاچاخییێ، تیمێن مە شیان تۆرەکا تاوانکاری هەلبوەشینن کو پەترۆلا خاڤ ژ بۆرییەکا ستراتیژی ل پارێزگەها موسەننا دزی."
پەیڤدارێ دەزگەهێ ئاسایشا نیشتیمانی یێ عێراقێ هەروەسا گۆت: "ئۆپەراسیۆن پشتی کۆمکرنا زانیارییێن هویر یێن هەواڵگری ژ لایێ رێڤەبەرییێن ئاسایشا بەسرە و موسەننا دەستپێکر، تیمێن دەزگەهی ژ بەغدا چاڤدێرییا لڤینێن ڤی باندی کر هەتا کو گەهشتینە جهێ قاچاخییێ."
ل گۆرەیی دەزگەهێ ئاسایشا نیشتیمانی یێ عێراقێ، دەما چووینە سەر وی جهی، چار تۆمەتبار هاتنە دەستەسەرکرن و دەست ب سەر وان ترومبێلان دا هاتە گرتن یێن کو بۆ ڤەگوهاستنا پەترۆلێ دهاتنە بکارئینان.
باندی کێلگەهەک ل نێزیک بۆرییا ستراتیژی (کو ژ باشوورێ عێراقێ بەرەڤ حەدیسە دچیت) کربوو جهێ کارێن خۆ.
پشکنینان دیارکر کو باندی دو کون ل بۆرییا سەرەکی کربوون و ب درێژاهییا 270 مەتران ب بن ئەردی را ب بۆرییەکێ پەترۆل بۆ ناڤا کێلگەهێ ڤەگوهاستبوو.
هەروەسا بارهەلگرێن چیمەنتۆیێ (میکسەر) بکارئینابوون و دەستکاری تێدا کربوو دا کو پەترۆلێ تێدا ڤەشێرن و ل زالگەهان گۆمان ل سەر وان نەهێتە کرن.
ئەرشەد حاکم گۆت: "ڤەکۆلینێن دەستپێکی دیار دکەن کو داهاتێ مەهانە یێ ڤی باندی ژ دزینا پەترۆلێ گەهشتییە نێزیکی 500 ملیۆن دینارێن عێراقی."
پەیڤداری هەروەسا گۆت: "پسپۆرێن تەکنیکی ئاماژەیێ ب وێ یەکێ دکەن کو ژ بەر ژەنگگرتنا جهێ کونان، دیارە ئەڤ کارە بۆ دەمەکێ درێژ یێ بەردەوام بوو. نوکە هەردو کون هاتینە چێکرن و تۆمەتبار ژی بۆ دادگەهێ هاتینە رەوانەکرن."